على كثر الجروح اللي بقلبي وخافقي مشتاقــ// منتدى محمد الدراجي

على كثر الجروح اللي بقلبي وخافقي مشتاق
ضواني ليلي وقلبي تحزّم ثورة أشواقه
صرخت بداخلي صرخه تلوذ الروح بالأعماق
تموت الصرخة بجوفي وهو غايب بأعماقه
تجول بخاطري كلمه تباري دمعة الأحداق
تغارق صوتي بدمعي بوقت(ن) جفّت أحداقه
جرحت الحب بغيابك طعنت الروح دون ارفاق
سلبت شفاهي البسمة خذلت الرمش برفاقه
توقعتك تجي تسقي عروقي بالهوى ترياق
عروق(ن) في حنايا صدر بين يديك ترياقه
توقعتك تجي تغرق حياتي بالهوى إغراق
توقعتك تجي تمسح دموع عيون غراقه
توقعتك تجي تطفي لهيبٍ بالحشا حراق
تزايد ناره فبعدك يزيد الجمر بإحراقه
توقعتك تجي نقضي بقايا عمرنا بعناق
تجيني ارتمي بحضنك بليل يزين بعناقه
توقعت الغلا يسري بدمك دايما" ينساق
وتوقعت الوله في داخلك واقف على ساقه
توقعت الهوى في سلمكم ذوق وأدب وأخلاق
ويبقى الشوق بأرض الحب ويبقى الحب بأخلاقه
توقعت الوفا منّك مثل نهرٍ علي دفاق
توقعتك تجي بإخلاص مع أشواق دفاقه
توقعتك تجي بيدك قصيدة حب للعشاق
حسافه ياهوى قلبي : خذلت عيون مشتاقه
حسافة ياهوى بالي نقضت العهد والميثاق
حسافه ينهدم هالحب رغم عهده وميثاقه
بنيت من الوهم دنيا ألين أصبح فضاي إشراق
وقفت أسترجع الذكرى بليالي كانت إشراقه
بكيت من الصدود اللي سكن فيك وبقى خفاق
رفع رايات مكسوره دفن أرواح خفاقه
تعبت أبقى بليد(ن) فهم اخط النزف بالأوراق
تعبت أشكي تعبت أبكي بدمع(ن)بلل أوراقه
تعبت أبقى أسير(ن)وقت تعبت أطلب رضا بإشفاق
تعبت اطلب رضا قلبك ونفسي دوم شفاقه
حزن مدري\حزن مدري\حزن مدري\حزن سبّاق
حزن يقضي على روح وليالي الجرح سباقه
وعلى كثر الجروح اللي بقلبي وخاطرك بفراق
ضواني ليلي وقلبك توّلم يعلن فراقه
غفيت وهالحزن صاحي صحيت وهالحزن براق
تخيل حزني الطاغي سحايب دمع براقه




منتدى محمد الدراجي